Rəşad Məcid Mətbuat Şurasının sədri seçildi
Sentyabrın 24-ü Bakıda, Beynəlxalq Muğam Mərkəzində Azərbaycan jurnalistlərinin qurultayı keçirilib, Rəşad Məcid Mətbuat Şurasının sədri seçilib.
Təsis olunduğu 2003-cü il martın 15-dən Mətbuat Şurasına Əflatun Amaşov sədrlik edirdi.
Novator.az bildirir ki, 1964-cü il təvəllüdlü Rəşad Məcid Bakı Dövlət Universitetinin jurnalistika fakültəsini bitirib. 1985-ci ildən “Elm və həyat” jurnalında (korrektor, müxbir) çalışıb. 1990-cı ildən Azərbaycan Bədii Tərcümə və Ədəbi Əlaqələr Mərkəzində sədr müavini, 1991-ci ildən “Ədalət” qəzetində, 1992-ci ildən “Azərbaycan” qəzetində baş redaktorun birinci müavini postlarını tutub. 1992-ci ildə “525-ci qəzet”i təsis edib.
1993-cü ildən “Azərmətbuatyayımı” İstehsalat Birliyinin rəisi, 1994-cü ildən Azərbaycan Tərcümə Mərkəzinin məsul katibi olub. 1995-ci ildən “525-ci qəzet”in baş redaktorudur.
Azərbaycan Yazıçılar Birliyi sədrinin müavinidir.
Mətbuat Şurası jurnalistlərin peşə fəaliyyətində qanunvericiliyə, peşə prinsiplərinə əməl etməsinə ictimai nəzarətə, dövlət orqanları və ictimaiyyətlə mətbuat arasında əlaqələrin tənzimlənməsinə, media vasitələrinin fəaliyyət sahələrində münaqişələrin həlli variantlarının araşdırılmasına məsuldur. Qurumun ofisi Bakıda, Məmməd Araz küçəsi, 4 ünvanında yerləşir.
