Neçə müəllimin maaşına əlavələr gəlir?
Elm və Təhsil Nazirliyi dövlət ümumi təhsil müəssisələrindəki ilk sertifikatlaşdırmanın nəticələrini açıqlayıb. Prosesə birinci mərhələdə Bakı Şəhər Təhsil İdarəsi, Abşeron-Xızı, Quba-Xaçmaz və Gəncə-Daşkəsən Regional Təhsil idarələrinə tabe olan, həmçinin Təhsil Nazirliyinin birbaşa tabeliyindəki ümumi təhsil müəssisələrində çalışan ibtidai sinif müəllimləri cəlb olunub.
Sentyabrın 21-də yayılan rəsmi məlumata görə, 30 avqust, 1 sentyabr və 13 sentyabrda sertifikatlaşdırmanın test mərhələsi keçirilib, 11133 iştirakçının 8766-sı keçid balını (30 bal) toplayıb.
Sertifikatlaşdırmanın 12-19 sentyabrda keçirilən müsahibə mərhələsinə 8707 nəfər qatılıb, onların 8676 nəfəri uğur qazanıb.
Test mərhələsində 50 baldan yuxarı bal toplamış 3086 təhsilverənin vəzifə maaşına 35 faiz əlavə, keçid balını toplamış 5590 təhsilverənin vəzifə maaşına 10 faiz əlavə düşür.
Aylıq əlavələr barədə qərarı avqustun 20-də Nazirlər Kabineti qəbul edib.
