Laçın yolu: müəmma ortaya çıxıb
Azərbaycanın Yuxarı Qarabağ bölgəsindən Ermənistana gedən Laçın yolu ilə bağlı müəmma ortaya çıxıb. Rusiya Müdafiə Nazirliyinin rəsmi saytında yer alan xəritədə Laçın şəhəri sülhməramlı kontingentin nəzarətində olan ərazi kimi verilib.
Novator.az bildirir ki, İkinci Qarabağ müharibəsinin bitdiyi 10 noyabr 2020-ci ildən Laçın rayonunun bir hissəsi Yuxarı Qarabağdan Ermənistana gediş-gəliş üçün ayrılıb. Həmin yolun üstünə düşən Laçın şəhərinə və rayonun Qarıkaha, Ağanus, Fətəlipəyə, Kəravuz, Sus, Zabux kəndlərinə Rusiya sülhməramlı kontingenti nəzarət edib.
2022-ci il avqustun 11-də Laçın şəhəri və rayonun kəndlərindən yan keçən yeni yolun inşası bitib, avqustun 26-da Laçın rayonunun tam azad edildiyi, avqustun 30-da Rusiya sülhməramlı kontingentinin yeni yolun mühafizəsinə keçdiyi bəyan olunub.
Azərbaycan Demokratiya və Rifah Partiyasının sədri Qubad İbadoğlu yazır ki, sentyabrın 18-dən Rusiya Müdafiə Nazirliyinin saytında Laçın şəhəri və Ağanus kəndi sülhməramlıların nəzarət zonasında göstərilir (Xəritə). Siyasətçi Azərbaycanın səlahiyyətli dövlət orqanlarını bununla bağlı izahat verməyə çağırıb.
