Makroiqtisadi hesabat
Dövlət Statistika Komitəsi makroiqtisadi göstəriciləri açıqlayıb. Novator.az bildirir ki, hesabata görə, 2022-ci ilin yanvar-avqust aylarında kənd təsərrüfatının ümumi məhsulu ötən ilin eyni dövrü ilə müqayisədə 3,2 faiz (heyvandarlıq məhsulları istehsalı 2,7 faiz, bitkiçilik məhsulları istehsalı 3,6 faiz) artıb.
Nəqliyyat sektorunda yük daşınması üzrə 11,8 faiz, sərnişin daşınması üzrə 37,7 faiz yüksəliş qeydə alındığı vurğulanır.
İnformasiya və rabitə xidmətlərinin həcmi üzrə artım 15,3 faiz göstərilir.
Rəsmi məlumata əsasən, əhalinin gəlirləri nominal ifadədə 20 faiz artıb, yanvar-avqust aylarında dövlət büdcəsinə 20 milyard 184,8 milyon manat gəlib, büdcədən 18 milyard 151,9 milyon manat vəsait xərclənib, avqustun 1-nə bank və digər kredit təşkilatlarının kredit portfeli milli valyuta ekvivalentində 18 milyard 985,6 milyon manat, əhalinin banklardakı əmanətlərinin milli valyuta ekvivalentində məbləği 10 milyard 817,1 milyon manat olub.
