Səmərqənd, Putin, Cinpin
Rusiya prezidenti Vladimir Putin Çin lideri Si Cinpinlə bir araya gələcək. Bu, Ukraynada müharibə başlanandan bəri iki liderin ilk üz-üzə görüşü olacaq.
Novator.az xəbər verir ki, görüşün Şanxay Əməkdaşlıq Təşkilatının sammiti çərçivəsində baş tutacağı açıqlanıb. Sammit sentyabrın 15-16-da Özbəkistanın Səmərqənd şəhərində keçiriləcək.
Putinlə Cinpin sonuncu dəfə fevral ayında, Pekində görüşüblər. Həmin görüş Rusiyanın Ukraynaya hərbi müdaxiləsindən bir neçə gün əvvələ təsadüf edib.
Rusiya 2022-ci il fevralın 24-dən Ukraynada total müharibə aparır.
Si Cinpin Çinə rəhbərlik edəndən bəri Vladimir Putinlə 38 dəfə görüşüb. O, 2012-ci ilin noyabrından Çin Kommunist Partiyasının baş katibi, 2013-cü ilin martından Çin Xalq Respublikasının sədri – dövlət başçısıdır.
Səmərqənd görüşündən bir neçə həftə sonra, oktyabrda Çin Kommunist Partiyasının 20-ci qurultayı keçiriləcək.
Kommunist Partiyası Çində yeganə partiyadır, ölkənin idarəçiliyinə məsuldur.
20-ci qurultayda partiyanın Mərkəzi Komitəsinin yeni tərkibi seçiləcək. Qaydaya əsasən, bundan dərhal sonra Mərkəzi Komitənin plenumu keçirilməli, növbəti beş illiyə baş katib seçilməlidir.
Si Cinpinin 20-ci qurultayda üçüncü müddətə baş katibi seçiləcəyi gözlənir.
Mənbə: CNN.com
