Sentyabrın 24-də Azərbaycan jurnalistlərinin qurultayı keçiriləcək. Qurultayda Mətbuat Şurasının İdarə Heyətinin yenilənəcəyi bəyan olunub. Novator.az-ın əldə etdiyi bilgiyə görə, şura sədrinin dəyişməsi də gözlənir.

Sədr qurultayda İdarə Heyəti üzvləri arasından seçilir. Təsis olunduğu gündən Mətbuat Şurasına sədrlik edən Əflatun Amaşovun namizəd olmayacağı bildirilir.

Mətbuat Şurası 2003-cü il martın 15-də, ölkə jurnalistlərinin ilk qurultayında yaradılıb.

23 nəfərlik İdarə Heyətində 11 yer jurnalistlərə, 7 yer ictimaiyyət nümayəndələrinə, 5 yer internet portalları təmsilçilərinə ayrılıb.

1957-ci il təvəllüdlü Əflatun Amaşov Moskva Dövlət Universitetinin jurnalistika fakültəsini bitirib. AZƏRTAC-ın müxbiri, şöbə müdiri, redaktoru, baş redaktoru, baş direktorunun birinci müavini, “Yeni Nəsil” Jurnalistlər Birliyinin sədr müavini, “RUH” Azərbaycan Jurnalistləri Müdafiə Komitəsinin sədri postlarını tutub.

2015-2020-ci illərdə Milli Məclisin deputatı olub.

“Şöhrət” ordeni laureatıdır.

Mətbuat Şurasının ofisi Bakıda, Məmməd Araz küçəsi, 4 ünvanında yerləşir.