Latviya hərbi çağırış sisteminə döndü
Latviyada hərbi xidmətə çağırış sistemi bərpa olunur. Novator.az bildirir ki, Nazirlər Kabinetinin 6 sentyabr qərarına görə, 18-27 yaşlı kişilər 1 illik həqiqi hərbi xidmətə çağırılacaq. 2023-cü ilin yanvarındakı ilk çağırışda xidmətin könüllü əsasda olması, iyul ayındakı ikinci çağırışdan isə məcburi xidmətin tətbiqi planlaşdırılır.
18-27 yaşlı qadınların könüllü hərbi xidmət hüququ var.
Həqiqi hərbi xidmət keçən şəxslərə 1 aylıq məzuniyyət, şənbə-bazar günləri evə getmək imkanı veriləcəyi bəyan olunub.
Latviyada ümumi hərbi mükəlləfiyyət 2007-ci ildə ləğv edilib.
1991-ci ildə müstəqilliyini bərpa edən Latviya 2004-cü ildən NATO hərbi-siyasi ittifaqının (Şimali Atlantika Müqaviləsi Təşkilatının) üzvüdür.
Latviyada hərbi çağırış sisteminin bərpası Rusiyanın qonşu Ukraynaya təcavüzündən doğur. 2014-cü ildə Ukraynanın Krım yarımadasını, Donetsk və Luqansk vilayətlərinin bir hissəsini işğal edən Rusiya 2022-ci il fevralın 24-dən bu ölkədə total hərbi əməliyyatlar aparır, şərq və cənub bölgələrinin böyük bir hissəsini ələ keçirib.
