Qadağaya etiraz işi Ali Məhkəmədə
Ali Məhkəmə ölkədən çıxışı yasaqlanan siyasətçi Tofiq Yaqublunun şikayətinə baxacaq. Proses oktyabrın 26-na təyin olunub.
Sentyabrın 2-də Novator.az-a danışan siyasətçi deyib ki, ata yurdu Gürcüstana səfərinə icazə verilmir: “2021-ci il iyulun 11-də anam vəfat etdi. Onda ev dustağı idim, dəfnə, yasa getməyimə razılıq verilmədi. Suraxanı Rayon Məhkəməsinə üz tutdum, müraciətim təmin edilmədi, Bakı Apellyasiya Məhkəməsi həmin qərarı qüvvədə saxladı. İndi bu işə Ali Məhkəmə baxacaq”.
1961-ci ildə Gürcüstanın Bolnisi rayonunun İncəoğlu kəndində doğulan Tofiq Yaqublu milli azadlıq hərəkatının (1988-1991) fəalı, Birinci Qarabağ müharibəsinin veteranı, Müsavat Partiyasının və Demokratik Qüvvələrin Milli Şurasının üzvüdür.
1998-ci ildə 2 il müddətinə şərti azadlıqdan məhrumetmə cəzasına məhkum edilib.
2013-cü il fevralın 4-dən 2016-cı il martın 17-dək həbsdə olub.
2020-ci il martın 22-də Tofiq Yaqublu yenidən tutulub, sentyabrın 3-də Bakının Nizami Rayon Məhkəməsinin hökmü ilə 4 il 3 aylıq azadlıqdan məhrumetmə cəzası alıb. Sentyabrın 18-də Bakı Apellyasiya Məhkəməsi Tofiq Yaqublu haqqında həbs qətimkan tədbirini ev dustaqlığı ilə əvəzləyib.
2021-ci il iyulun 15-də Bakı Apellyasiya Məhkəməsi siyasətçiyə kəsilən 4 il 3 aylıq azadlıqdan məhrumetmə cəzasının yerdə qalan hissəsini şərti cəza ilə əvəzləyib, 2 il 6 aylıq sınaq müddəti qoyub.
Siyasətçi bəraət istəyi ilə Ali Məhkəməyə şikayət edib.
Tofiq Yaqublu bu yay üzərində nəzarətə məsul Bakı Şəhər Probasiya İdarəsinə müraciət edərək anasının ilində iştiraka, məzarını ziyarət eləməyə razılıq istəyib, ancaq yenə yox cavabı alıb.
