Prezident beynəlxalq forumda çıxış edib
Sentyabrın 2-si İtaliyanın Çernobbio şəhərində “The European House – Ambrosetti” beyin mərkəzinin “Dünya, Avropa və İtaliyaya baxış” və “Rəqabətli strategiyalar üçün bu günün və sabahın ssenarisi” mövzulu beynəlxalq Çernobbio forumu başlayıb. AZƏRTAC xəbər verir ki, Azərbaycan prezidenti İlham Əliyev İtaliya prezidenti, baş naziri və “The European House – Ambrosetti” beyin mərkəzinin dəvəti ilə qatıldığı forumun plenar iclasında “Enerji təhlükəsizliyinin təmin olunmasında Azərbaycanın rolu” mövzusunda çıxış edib.
1965-ci ildən fəaliyyət göstərən “The European House – Ambrosetti” İtaliyanın idarəetmə-məsləhət xidməti sahəsində aparıcı beyin mərkəzi hesab olunur. Qurumun Mərkəz Avropa və onun hüdudlarından kənarda ofisləri və geniş tərəfdaşlıq şəbəkəsi var.
“The European House – Ambrosetti” İtaliya və Avropa üçün potensiala malik ölkələrlə əməkdaşlığın təşviqinə müsbət təsir etmək imkanı olan və ikitərəfli iqtisadi gündəmləri inkişaf etdirmək iqtidarında olan liderləri bir araya gətirərək yüksək səviyyəli müzakirə platformaları da təqdim edir.
İlham Əliyev avqustun 31-dən İtaliyada işgüzar səfərdədir.
