Roma gündəliyi
Sentyabrın 1-i Romada Azərbaycanın İtaliyadakı səfirliyinin yeni binası açılıb. AZƏRTAC-ın məlumatına görə, prezident İlham Əliyev açılışda iştirak edib, səfirliyin həyətində ağac əkib, binada yaradılan şəraitlə tanış olub.
Prezident həmçinin İtaliya-Azərbaycan Universiteti üzrə əməkdaşlıq çərçivəsinin müəyyən edilməsi, fakültə və proqramların yaradılması ilə bağlı mərasimə qatılıb. Mərasimdə Azərbaycan Diplomatik Akademiyası Universiteti ilə İtaliyanın Luiss Guido Carli Universiteti, Romanın Sapienza Universiteti, Turin Politexnik Universiteti, Alma Mater Bolonya Universiteti və Milan Politexnik Universiteti arasında akademik əməkdaşlığa dair imzalanmış sazişlər mübadilə edilib, İlham Əliyev nitq söyləyib.
Həmin gün İlham Əliyev İtaliya prezidenti Serco Mattarella və Nazirlər Şurasının sədri Mario Draqi ilə görüşlər də keçirib.
İlham Əliyev avqustun 31-dən İtaliyanın paytaxtı Romadadır. Dövlət başçısını işgüzar səfərə İtaliya prezidenti dəvət edib.
