Sentyabrın 1-də Avropa İnsan Hüquqları Məhkəməsi Azərbaycandan şikayətlər üzrə qərarlar elan edib. Aihmaz.org xəbər verir ki, Müsavat Partiyasının üzvü Yadigar Sadıqovun da şikayəti əsaslı sayılıb. 2013-cü il iyunun 27-də Lənkəranda tutulan Yadigar Sadıqov xuliqanlıqda ittiham olunaraq azadlıqdan məhrum edilib, 2016-cı il martın 17-də əfvə düşüb. Avropa Məhkəməsi Yadigar Sadıqovun məhkəməyə qədər həbsdə saxlanması üzrə şikayətini araşdıraraq Avropa İnsan Hüquqları Konvensiyasının pozuntusuna yol verildiyi qənaətinə gəlib, dövlətin ərizəçiyə 3500 avro təzminat ödəməsinə qərar verib.

Xırda xuliqanlıq və polisin qanuni tələbinə əməl etməmək ittihamı ilə inzibati məsuliyyətə cəlb edilmiş Xatirə Quliyeva azadlıq və şəxsi toxunulmazlıq hüquqlarına müdaxilədən şikayətçi olub. Qərara görə, dövlət ərizəçiyə 3500 avro təzminat ödəməlidir.

Rafiq Səfərovun şikayəti Azərbaycan tarixinə dair kitabının icazəsiz, ona qonorar ödənmədən çoxaldılması və internetdə yayılması üzrə mübahisəni əhatə edib. Avropa Məhkəməsi ərizəçinin mülkiyyət hüququna müdaxilənin baş verdiyi qənaətinə gəlib. Qərara görə, dövlət ərizəçiyə 5000 avro təzminat ödəməlidir.

Fransanın Strasburq şəhərində yerləşən, hakimləri Avropa Şurasına üzv ölkələrdən seçilən Avropa Məhkəməsi Avropa İnsan Hüquqları Konvensiyasına riayət olunmasına nəzarət edir.

Azərbaycan 1949-cu ildə yaradılmış Avropa Şurasına 2001-ci ildə qoşulub, 2002-ci ildən Avropa Məhkəməsinin təsir dairəsindədir.