Mixail Qorbaçov
Siyasətçi, dövlət xadimi Mixail Qorbaçov avqustun 30-u Rusiyanın paytaxtı Moskvada vəfat edib.
Novator.az bildirir ki, 1931-ci il martın 2-si Şimali Qafqazda doğulan Mixail Qorbaçov Moskva Dövlət Universitetini hüquqşünas ixtisası, Stavropol Kənd Təsərrüfatı İnstitutunu iqtisadçı-aqronom ixtisası ilə bitirib.
1952-ci ildə Sovet İttifaqı Kommunist Partiyasına qoşulan Mixail Qorbaçov uzun illər Stavropol şəhəri və diyarında komsomol, partiya təşkilatlarına rəhbərlik edib, 1978-ci ildən Sovet İttifaqı Kommunist Partiyası Mərkəzi Komitəsinin katibi postunu tutub, 1980-ci ildən Siyasi Büroda təmsil olunub.
1985-ci il martın 11-də Mixail Qorbaçov Sovet İttifaqının rəhbəri – Kommunist Partiyası Mərkəzi Komitəsinin baş katibi seçilib, 1988-ci il oktyabrın 1-dən həmçinin Ali Sovetə sədrlik edib, 1990-cı il martın 15-dən Sovet Sosialist Respublikaları İttifaqının (SSRİ) prezidenti olub.
1991-ci il avqustun 19-dan SSRİ-nin dağılması sürətlənib, dekabrın 25-də Mixail Qorbaçov səlahiyyətlərinin bitdiyini bəyan edib, 1992-ci ildən ictimai fəaliyyət göstərib.
1922-ci ildə yaradılmış SSRİ-yə dağıldığı ilə qədər 15 respublika daxil olub: Estoniya, Latviya, Litva, Moldova, Belarus, Ukrayna, Rusiya, Azərbaycan, Ermənistan, Gürcüstan, Qazaxıstan, Qırğızıstan, Tacikistan, Özbəkistan, Türkmənistan.
