Azərbaycan Ordusu Laçında
Avqustun 26-da Laçın şəhəri, rayonun Zabux və Sus kəndləri Azərbaycan Ordusu bölmələrinin tam nəzarətinə götürülüb. Müdafiə Nazirliyi bildirir ki, ərazilərdə bölmələrin dislokasiya məntəqələrinə yerləşdirilməsi, mühəndis işlərinin görülməsi istiqamətində işlər aparılır.
Ermənistan 1988-1994-cü illərin təcavüzündə Azərbaycanın bütün cənub-qərbini, həmçinin Sədərək rayonunun 1, Qazax rayonunun 7 kəndini işğal edib.
2020-ci il sentyabrın 27-dən Azərbaycanın apardığı hərbi əməliyyatlarda və noyabrın 10-da əldə edilən atəşkəs razılaşması nəticəsində Cəbrayıl, Füzuli, Zəngilan, Qubadlı, Ağdam, Kəlbəcər rayonları tam, Şuşa, Laçın, Xocavənd, Xocalı rayonları və keçmiş Ağdərə rayonu qismən azad olunub, Yuxarı Qarabağa və bölgədən Ermənistana gedən yola Rusiya sülhməramlı kontingenti yeridilib.
Laçın rayonunun bir hissəsi Yuxarı Qarabağdan Ermənistana gediş-gəliş üçün ayrılıb. Həmin yolun üstünə Laçın şəhəri və rayonun Qarıkaha, Ağanus, Fətəlipəyə, Kəravuz, Sus, Zabux kəndləri düşüb.
2022-ci il avqustun 11-də Azərbaycan Avtomobil Yolları Dövlət Agentliyi ölkənin Yuxarı Qarabağ bölgəsindən Ermənistana gedən yeni avtomobil yolunun tikintisinin yekunlaşdığını bəyan edib. Bu yol Laçın şəhəri və rayonun kəndlərindən yan keçir. Rusiya sülhməramlı kontingentinin yeni yolun mühafizəsinə keçməsi gözlənir.
Xankəndi, Xocalı, Ağdərə, Xocavənd şəhərləri, Şuşa, Xocalı, Xocavənd rayonlarının və keçmiş Ağdərə rayonunun bir hissəsi işğalda qalır.
Laçının hansı kəndləri rusların nəzarətindədir?
