3 turnir, 96 komanda
UEFA-nın klub turnirlərində təsnifat raundları bitib. Novator.az bildirir ki, 2022-2023 mövsümünə buraxılmış 233 komandanın 96-sı marafonu davam etdirir – Çempionlar Liqası, Avropa Liqası və Konfrans Liqasının qrup mərhələlərinin hər birində 32 klub yarışacaq.
55 UEFA üzvünün (Rusiya yarışlardan kənardır) 18-i komandasız qalıb.
Çempionlar Liqasındakı komandaların 14-nün turnirdə zəfəri var. 1955-ci ildən keçirilən, 1991-ci ilə qədər Çempionlar kuboku adlanmış turnirdə “Real” 14, “Milan” 7, “Bavariya”, “Liverpul” 6, “Barselona” 5, “Ayaks” 4, “İnter” (İtaliya) 3, “Benfika”, “Yuventus”, “Portu”, “Çelsi” 2, “Seltik”, “Marsel”, “Borussiya” (Dortmund) 1 titula sahibdir.
Avropa Liqasında yer alan komandaların 3-ü turnirdən qalib ayrılıb. 1971-ci ildən keçirilən, 2008-ci ilədək UEFA kuboku adlanmış turnirdə “Feyenoord” 2, PSV, “Mançester Yunayted” 1 zəfər əldə edib.
Konfrans Liqasında ilk mövsümü – 2021-2022 mövsümünü udan “Roma” Avropa Liqasındadır.
Çempionlar Liqasının qruplarında üçüncü yeri tutan komandalar Avropa Liqasına, Avropa Liqasının qruplarında üçüncü yeri tutan komandalar Konfrans Liqasına adlayacaq.
Azərbaycan təmsilçisi “Qarabağ” Avropa Liqasının G qrupunda “Olimpiakos” (Yunanıstan), “Frayburq” (Almaniya), “Nant” (Fransa) komandaları ilə mübarizə aparacaq.
UEFA-nın klub reytinqində Azərbaycan 29-cu pillədə qərar tutur. Reytinq turnirlərdə son beş mövsümdə qazanılan əmsala əsaslanır. Təsnifat mərhələlərində qələbə 1 xal, heç-heçə yarım xal, qrup mərhələsində, 1/8 final, 1/4 final, yarımfinal və finalda qələbə 2 xal, heç-heçə 1 xaldır.
Çempionlar Liqasının qrup mərhələsi 4 bonus xalı, 1/8 finalı 5 bonus xalı, 1/4 finalı, yarımfinalı və finalı 1 bonus xalı verir.
Avropa Liqasında qrup qalibi olmağa 4 bonus xalı, qrupda ikinci yeri tutmağa 2 bonus xalı, 1/8 finala, 1/4 finala, yarımfinala və finala adlamağa 1 bonus xalı düşür.
Konfrans Liqasında qrup qalibi olmaq 2 bonus xalı, qrupda ikinci yeri tutmaq 1 bonus xalı, yarımfinal və final 1 bonus xalı qazandırır.
Toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır.
2022-2023 mövsümündə Azərbaycan 2,000 əmsal əldə edib.
