Xarici ticarətin yeddi ayı
Dövlət Gömrük Komitəsi xarici ticarət hesabatı yayıb. Novator.az bildirir ki, rəsmi açıqlamaya görə, Azərbaycanın hüquqi və fiziki şəxsləri 2022-ci ilin yanvar-iyul aylarında 170 ölkə ilə ticarət əməliyyatı aparıb, 22 milyard 565 milyon dollarlıq ixrac, 7 milyard 493,8 milyon dollarlıq idxal rəsmiləşib, dövlət büdcəsinə 3 milyard 20,2 milyon manat ödənib.
Yeddi ayda ixracın 20,8 milyard dolları neft-qaz sektorunun payına düşüb. Qalan yüksək ixrac göstəriciləri belə sıralanır: meyvə-tərəvəz – 376,9 milyon dollar, kimya sənayesi məhsulları – 227,1 milyon dollar, plastmas və ondan hazırlanan məmulatlar – 209,5 milyon dollar, alüminium və ondan hazırlanan məmulatlar – 144,8 milyon dollar, pambıq lifi – 142,1 milyon dollar.
Ən yüksək idxal göstəriciləri belədir: maşın, mexanizm, elektrik aparatları, avadanlıqlar və onların hissələri – 1,4 milyard dollar, yeyinti məhsulları – 1,1 milyard dollar, nəqliyyat vasitələri və onların hissələri – 928,2 milyon dollar, qara metallar və onlardan hazırlanan məmulatlar – 535,8 milyon dollar, əczaçılıq məhsulları – 376,7 milyon dollar, plastmas və ondan hazırlanan məmulatlar – 267,8 milyon dollar, oduncaq və ondan hazırlanan məmulatlar – 203 milyon dollar, geyim və geyim üçün ləvazimatlar – 139,3 milyon dollar.
İxracın 4,3 faizinin MDB ölkələrinin, 63,8 faizinin Avropa İttifaqı ölkələrinin, 31,9 faizinin başqa ölkələrin payına düşdüyü, idxalda MDB-nin payının 29 faiz, Avropa İttifaqının payının 15,5 faiz, başqa ölkələrin payının 55,5 faiz, ticarət dövriyyəsi və ixrac üzrə əsas tərəfdaşın İtaliya, idxal üzrə əsas tərəfdaşın Rusiya olduğu vurğulanır.
