Makroiqtisadi göstəricilər
2022-ci ilin yanvar-iyul aylarında Azərbaycanda kənd təsərrüfatının ümumi məhsulu ötən ilin eyni dövrü ilə müqayisədə 3,1 faiz (heyvandarlıq məhsulları istehsalı 2,7 faiz, bitkiçilik məhsulları istehsalı 3,4 faiz) artıb. Dövlət Statistika Komitəsi belə hesabat yayıb.
Rəsmi məlumata görə, nəqliyyat sektorunda yük daşınması 11,7 faiz, sərnişin daşınması 37,6 faiz irəli gedib, informasiya və rabitə xidmətlərinin həcmi 15,6 faiz yüksəlib.
Əhalinin gəlirlərinin nominal ifadədə 20 faiz artdığı, yanvar-iyul aylarında dövlət büdcəsinə 17 milyard 899,4 milyon manatın daxil olduğu, büdcədən 15 milyard 334,8 milyon manatın xərcləndiyi vurğulanır.
İyulun 1-nə bank və digər kredit təşkilatlarının kredit portfeli milli valyuta ekvivalentində 18 milyard 818,2 milyon manat, əhalinin banklardakı əmanətlərinin milli valyuta ekvivalentində məbləği 10 milyard 596,2 milyon manat göstərilib.
Yeddi ayda ödənişli xidmətlərin dəyərinin 2021-ci ilin yanvar-iyul aylarına nəzərən real ifadədə 7,2 faiz, ictimai iaşə dövriyyəsinin real ifadədə 1,5 dəfə artdığı bildirilir.
Avqustun 1-nə iqtisadi fəal əhalinin sayı 5 milyon 342,1 min nəfər olub, onların 5 milyon 34,3 min nəfəri məşğul əhali kimi rəsmiləşib.
Hesabata əsasən, yarım il ərzində ölkədə 33,5 min yeni iş yeri açılıb, 4,3 min iş yeri bağlanıb.
