Turizm və Menecment Universitetinin statusu yeniləndi
Azərbaycan Turizm və Menecment Universitetinin statusu dəyişir. Nazirlər Kabineti avqustun 9-da universitetin Dövlət Turizm Agentliyinin tabeliyində publik hüquqi şəxs statuslu təhsil ocağına çevrilmə yolu ilə yenidən təşkilinə qərar verib. Təsdiqlənən nizamnaməyə görə, universitetin fəaliyyət istiqamətləri bunlardır: bakalavriat təhsil səviyyəsində tam orta təhsil və orta ixtisas təhsili bazasında ayrı-ayrı ixtisasların təhsil proqramları üzrə genişprofilli ali təhsilli mütəxəssislərin hazırlanması; magistratura təhsil səviyyəsində ixtisaslaşmalar üzrə hər hansı ixtisas sahəsinin elmi tədqiqat və ya peşəkar məqsədlər üçün daha dərindən öyrənilməsi; doktorantura təhsil səviyyəsində yüksəkixtisaslı elmi kadrların hazırlanması, ixtisas və elmi dərəcələrin yüksəldilməsi; orta ixtisas və əlavə təhsil proqramlarının həyata keçirilməsi; elmin müxtəlif sahələri və istiqamətləri üzrə tədqiqatlar aparılması.
Universitetin nizamnamə fondu 11 milyon 488 min 507 manat 76 qəpikdir.
Əsası 2006-cı ildə qoyulan Azərbaycan Turizm və Menecment Universiteti Bakıda, Koroğlu Rəhimov küçəsində yerləşir.
2017-ci il sentyabrın 11-dən universitetə İlham Mədətov rektorluq edir.
