Macar səddi yarıldı
UEFA Çempionlar Liqasının 2022-2023 mövsümündə ələmələr finişə yaxınlaşır. Novator.az-ın məlumatına görə, Azərbaycan təmsilçisi “Qarabağ” avqustun 9-da üçüncü mərhələnin ikinci oyununu keçirib. Macarıstanın paytaxtı Budapeştdə “Ferensvaroş”un qonağı olan komanda 3:1 hesabı ilə üstün gələrək raundu adlayıb.
Evdəki 3 avqust oyununda “Qarabağ” bərabərlik əldə etmişdi – 1:1.
“Qarabağ” dördüncü raundda – son ələmə mərhələsində “Viktoriya” (Çexiya) ilə üz-üzə gələcək.
Dördüncü mərhələdə ələnən komandalar Avropa Liqasına köçəcək.
Qrup mərhələsinə bu komandalar birbaşa vəsiqə alıb: İngiltərədən “Mançester Siti”, “Liverpul”, “Çelsi”, “Tottenhem”, İspaniyadan “Real”, “Barselona”, “Atletiko”, “Sevilya”, İtaliyadan “Milan”, “İnter”, “Napoli”, “Yuventus”, Almaniyadan “Bavariya”, “Borussiya” (Dortmund), “Bayer”, “Leypsiq”, “Ayntraxt” (Frankfurt), Fransadan PSJ, “Marsel”, Portuqaliyadan “Portu”, “Sportinq”, Niderlanddan “Ayaks”, Belçikadan “Brügge”, Avstriyadan “Zalsburq”, Şotlandiyadan “Seltik”, Ukraynadan “Şaxtyor”.
