Xalq hakimiyyətinə keçid təklifləri
Qubad İbadoğlunun sədrlik etdiyi Azərbaycan Demokratiya və Rifah (ADR) Partiyası xalq hakimiyyətinə (iştirakçı demokratiyaya) keçid təklifləri verib. Novator.az bildirir ki, təkliflər arasında hakimiyyətin təmizlənməsini nəzərdə tutan “Lüstrasiya haqqında” qanunun qəbulu; konstitusiya islahatları aparmaq üçün müstəqil, iqtidar və müxalif mövqeli təşkilatların eyni sayda təmsilçilərindən ibarət işçi qrupun yaradılması; azad və ədalətli seçkilər üçün Mərkəzi Seçki Komissiyasını real paritet əsasda formalaşdırmaq; qarışıq seçki sisteminin bərpası, parlament üzvlərinin sayının 150 nəfərə qaldırılması, onların yarısının proporsional qaydada (partiya siyahıları üzrə), yarısının majoritar qaydada (dairələr üzrə) seçilməsi; icra hakimiyyətinin səlahiyyətlərini məhdudlaşdırmaq, paralel icra strukturlarının, o sıradan vitse-prezidentlik institutunun ləğvi, Milli Məclisin və məhkəmə hakimiyyətinin səlahiyyətlərinin genişləndirilməsi kimi məsələlər yer alır.
Partiya hesab edir ki, təməl insan hüquq və azadlıqlarına dair beynəlxalq öhdəliklərin qısa bir zamanda həyata keçirilməsi, bunun üçün ayrıca konstitusiya qanununun qəbul edilməsi və qanunun pozulmasına görə ən ağır cəza növünün tətbiqi zəruridir.
Təkliflər arasında Azərbaycanın Avropa İttifaqına sıx inteqrasiyası, ölkənin Dünya Ticarət Təşkilatına üzvlüyü, yerli idarəetmə islahatlarının aparılması və başqa məsələlər də var.
ADR Partiyası 2021-ci il oktyabrın 17-də keçirilən qurultayda təsis olunub. 2015-ci ildən fəaliyyət göstərmiş Azərbaycan Demokratiya və Rifah Hərəkatının bazasında yaradılan partiyanın rəhbərliyində Adil Qeybulla, Arifə Hüseynli, Ellada Məmmədli, Ədalət Yusub, Əlövsət Sadıqlı, Əlövsət Talışxanlı, Hüseyn Məlik, Rafiq Abdullalı, Rövşən Dəmirli, Rüfət Əliyev, Rüfət Muradlı, Samir Abbaslı və başqa şəxslər yer alır.
Qubad İbadoğlu 1971-ci ildə doğulub. İqtisad elmləri namizədi, London İqtisadiyyat Məktəbinin professorudur.
