Qarabağ yolunda durum necədir?
Azərbaycan Avtomobil Yolları Dövlət Agentliyi Yuxarı Qarabağdan Ermənistana gedən yeni yolun tikintisi ilə bağlı məlumat yayıb. Açıqlamaya görə, torpaq işləri bitən ərazilərdə yol geyimi inşa edilir, asfalt-beton örtüyü döşənir, yol çiyinləri bərkidilir, asfaltlanma işləri yekunlaşan hissələrdə üfüqi nişanlanma xətləri çəkilir, zəruri yerlərdə yol nişanları və mühafizə səddi quraşdırılır.
Tikintisi 2021-ci ilin iyul ayından aparılan 32 kilometrlik yolun 10 kilometri Ermənistan ərazisində yerləşir.
Novator.az bildirir ki, yeni yol Laçın şəhəri və rayonun kəndlərindən yan keçir.
1988-ci ildə ermənilər Azərbaycanın Yuxarı Qarabağ bölgəsinin Ermənistana verilməsi tələbi ilə təcavüzə başlayıb. 1991-ci ildə ermənilər bölgəni “müstəqil dövlət” elan edib. Bunun ardınca müharibə alovlanıb, 1994-cü ildə elan olunan atəşkəsə qədər Ermənistan Yuxarı Qarabağı və onun ətrafındakı bölgələri ələ keçirib.
2020-ci il sentyabrın 27-dən Azərbaycanın apardığı hərbi əməliyyatlarda Cəbrayıl, Füzuli, Zəngilan, Qubadlı, Şuşa şəhərləri, bu rayonların, eləcə də Xocavənd, Xocalı, Laçın rayonlarının, keçmiş Ağdərə rayonunun bir çox məntəqəsi azad olunub. Noyabrın 10-da hərbi əməliyyatlar dayandırılıb, Yuxarı Qarabağa və bölgədən Ermənistana gedən Laçın yoluna Rusiyanın sülhməramlı kontingenti yerləşdirilib. Dekabrın 1-dək Ağdam, Kəlbəcər, Laçın rayonları Azərbaycana qaytarılıb.
Xankəndi, Xocalı, Ağdərə, Xocavənd şəhərləri, Şuşa, Xocalı, Xocavənd rayonlarının və keçmiş Ağdərə rayonunun bir hissəsi işğalda qalır.
Laçın rayonunun bir hissəsi Yuxarı Qarabağdan Ermənistana gediş-gəliş üçün ayrılıb. Həmin yolun üstünə düşən Laçın şəhəri və rayonun Qarıkaha, Ağanus, Fətəlipəyə, Kəravuz, Sus, Zabux kəndləri indiyədək azad olunmayıb.
2020-ci il noyabrın 10-da Azərbaycan, Ermənistan və Rusiyanın əldə etdiyi birgə razılaşmaya görə, üç il ərzində Yuxarı Qarabağla Ermənistan arasında əlaqəni təmin edən Laçın yolu üzrə yeni hərəkət marşrutu müəyyən olunmalı, Rusiya sülhməramlı kontingenti həmin marşrutun mühafizəsi üçün yer dəyişdirməlidir.
