Oğurluğa işarə
İqtisadçı alim, Azərbaycan Demokratiya və Rifah Partiyasının sədri Qubad İbadoğlu yazır ki, Dövlət Neft Şirkətinin (SOCAR) 2021-ci il hesabatı, eyni zamanda xarici qiymətləndiricinin apardığı maliyyə diaqnostikası bir çox qaranlıq məqama işıq salıb: “Şirkətə yeni rəhbərliyin gətirilməsi 2021-ci ildə şişirdilmiş xərclərin optimallaşdırılmasına və qənaətə şərait yaradıb. 2021-ci ildə təkcə əməliyyat xərcləri 2020-ci ilə nisbətən 663 milyon manat azalıb. 2020-ci ildə əməliyyat xərci 4 milyard 576 milyon manat, 2021-ci ildə 3 milyard 913 milyon manat göstərilib.
2021-ci ildə SOCAR-ın inzibati xərclərinə 2020-ci illə müqayisədə 27 milyon manat qənaət edilib. 2020-ci ildə SOCAR-ın ümumi və inzibati xərcləri 1 milyard 483 milyon manat, 2021-ci ildə 1 milyard 456 milyon manat olub.
2021-ci ildə “digər xərclər” maddəsində 2020-ci ilə nisbətən 735 milyon manat azalma rəsmiləşib. 2020-ci ildə SOCAR-da “digər xərclər” 1 milyard 930 milyon manat olduğu halda 2021-ci ildə bu göstərici 1 milyard 195 milyon manat təşkil edib.
Bir il ərzində SOCAR-da üç xərc maddəsindən əldə olunan qənaət 1 milyard 425 milyon manatdır. Bu məbləğ xərclərin şişirdilməsindən SOCAR-a 15 ildən çox prezidentlik etmiş Rövnəq Abdullayevin və onun komandasının qazancının bir hissəsi deməkdir. Belə hallar on illərdir xeyli dövlət şirkətində, o sıradan “Azərsu”, “Azərenerji”, “Azərişıq”, “Azərbaycan Hava Yolları” şirkətlərində adiləşib”.
SOCAR Azərbaycanda və xaricdə neft və qaz yataqlarının axtarışını, kəşfiyyatını, hazırlanmasını, işlənməsini, neftin, qazın, kondensatın hasilatını, nəqlini, emalını, neft, neft-kimya və qaz məhsullarının paylanmasını, satışını həyata keçirir. Qurum 2020-ci ildə Azərbaycan İnvestisiya Holdinqinin idarəetməsinə verilib. 2021-ci ildə SOCAR-ın fəaliyyətinə ümumi rəhbərliyi və nəzarəti həyata keçirmək üçün Müşahidə Şurası yaradılıb. Müşahidə Şurasına sədrlik iqtisadiyyat naziri Mikayıl Cabbarova həvalə olunub.
2022-ci il fevralın 10-da Rövnəq Abdullayev Dövlət Neft Şirkətinin prezidenti vəzifəsindən azad edilib. Rövnəq Abdullayev bu postu 2005-ci ildən tutub, hazırda iqtisadiyyat nazirinin müavinidir.
2022-ci il iyulun 21-də Rövşən Nəcəf Dövlət Neft Şirkətinin prezidenti təyin olunub. Rövşən Nəcəf 2022-ci il fevralın 10-dan şirkətin birinci vitse-prezidenti, prezident vəzifəsinin icraçısı idi.
