Müsavatçıya bəraət istəyi
Bakının Binəqədi rayonunda, Daxili İşlər Nazirliyinin inzibati həbs məntəqəsində saxlanan müsavatçı Əziz Məmiyevə kəsilmiş cəzadan apellyasiya şikayəti verilib.
Bir qrup fəal iyulun 20-si paytaxtda, Nazirlər Kabinetinin binası qarşısında piket keçirməyə cəhd göstərib. Bakı Şəhər İcra Hakimiyyəti quru sərhədlərin açılması tələbi qoyulan aksiyaya razılıq vermədiyi üçün polis əməkdaşları toplaşanları dağıdıb. Aksiyada tutulan Müsavat Partiyasının üzvü Əziz Məmiyevə həmin gün Səbail Rayon Məhkəməsinin qərarı ilə 30 sutka inzibati həbs cəzası verilib. O, polis əməkdaşlarının qanuni tələbinə qəsdən tabe olmamaqda təqsirli bilinib.
Müdafiəçiləri ittihamı rədd edir. Novator.az-ın məlumatına görə, vəkil Osman Kazımovun Bakı Apellyasiya Məhkəməsinə təqdim etdiyi şikayətdə müsavatçıya bəraət verilməsi və onun azadlığa buraxılması istənir.
