İtaliya marafon ərəfəsində
Sentyabrın 25-i İtaliyada parlamentin hər iki palatasına növbədənkənar seçki keçiriləcək. Bu, hökumət böhranının nəticəsidir. İyulun 21-də baş nazir Mario Draqi bəzi siyasi qüvvələrin dəstəyini itirdiyini əsas gətirərək istefa verib. Prezident Serco Mattarella baş nazirə və hökumətə səlahiyyətlərin icrasını davam etdirməyi tapşırıb, parlamentin hər iki palatasını buraxıb.
Aşağı palata (Deputatlar Palatası) 630, yuxarı palata (Senat) 315 nəfərdən (+6 ömürlük senatordan) ibarətdir. 2020-ci ildə keçirilmiş konstitusiya referendumunda aşağı palatada deputatların sayı 400-ə, yuxarı palatada senatorların sayı 200-ə endirilib.
İtaliyada hökumət parlamentin hər iki palatasına beş ildən bir keçirilən seçkilərin nəticələri əsasında formalaşır. 2018-ci il martın 4-də Deputatlar Palatasına və Senata seçkilərdən sonra formalaşmış iki hökumətə Cüzeppe Konte baş nazirlik edib. Mario Draqinin hökuməti 2021-ci il fevralın 13-dən iş başındadır.
Novator.az bildirir ki, hazırda Deputatlar Palatasında ən çox mandatla Liqa Partiyası təmsil olunur: 132 yer. “5 ulduz” hərəkatının 104, Demokrat Partiyasının 97, “İrəli, İtaliya” Partiyasının 82 mandatı var.
Senatda “5 ulduz” hərəkatı 61, Liqa Partiyası 60, “İrəli, İtaliya” Partiyası 48, Demokrat Partiyası 40 yerə sahibdir.
