“Avroviziya 2023”: yeni ünvan rəsmiləşdi
“Avroviziya 2023” beynəlxalq mahnı müsabiqəsi Böyük Britaniyada keçiriləcək. Qərarı iyulun 25-də təşkilatçı qurum – Avropa Yayım Birliyi açıqlayıb.
İtaliyanın Turin şəhərində keçirilmiş “Avroviziya 2022”də Ukraynanın “Kaluş” qrupu zəfər çalıb. Qaydalara əsasən, növbəti yarışa Ukrayna ev sahibliyi etməli idi. Ancaq Ukrayna Rusiyanın hərbi işğalına məruz qaldığı üçün Böyük Britaniya yeni ünvan seçilib.
Böyük Britaniya təmsilçisi Sem Rayder “Avroviziya 2022”də ikinci yeri tutub.
Novator.az bildirir ki, iyulun 25-nə olan məlumata görə, 21 ölkə “Avroviziya 2023”də iştiraka razılıq verib: Albaniya, Almaniya, Avstriya, Belçika, Böyük Britaniya, Danimarka, Finlandiya, Fransa, İspaniya, İsrail, İsveç, İsveçrə, İtaliya, Kipr, Niderland, Norveç, Polşa, San Marino, Serbiya, Ukrayna, Yunanıstan.
İctimai teleradioları bir araya gətirən Avropa Yayım Birliyinin 1956-cı ildən keçirdiyi “Avroviziya” yarışında İrlandiya 7, İsveç 6, Böyük Britaniya, Fransa, Lüksemburq, Niderland 5, İsrail 4, Danimarka, İtaliya, Norveç, Ukrayna 3, Almaniya, Avstriya, İspaniya, İsveçrə 2, Azərbaycan, Belçika, Estoniya, Finlandiya, Latviya, Monako, Portuqaliya, Rusiya, Serbiya, Türkiyə, Yuqoslaviya, Yunanıstan 1 dəfə qalib olub.
Azərbaycan qatıldığı 14 “Avroviziya” yarışının 13-də finala çıxıb. 2008-ci ildə Elnur Hüseynov və Samir Cavadzadə 8-ci yeri, 2009-cu ildə Aysel Teymurzadə və Araş 3-cü yeri, 2010-cu ildə Səfurə Əlizadə 5-ci yeri, 2011-ci ildə Nigar Camal və Eldar Qasımov 1-ci yeri, 2012-ci ildə Səbinə Babayeva 4-cü yeri, 2013-cü ildə Fərid Məmmədov 2-ci yeri, 2014-cü ildə Dilarə Kazımova 22-ci yeri, 2015-ci ildə Elnur Hüseynov 12-ci yeri, 2016-cı ildə Səmra Rəhimli 17-ci yeri, 2017-ci ildə Diana Hacıyeva 14-cü yeri, 2019-cu ildə Çingiz Mustafayev 8-ci yeri, 2021-ci ildə Samirə Əfəndi 20-ci yeri, 2022-ci ildə Nadir Rüstəmli 16-cı yeri tutub.
“Avroviziya 2018”dəki təmsilçi Aysel Məmmədova yarımfinalda ələnib.
