Sərmayənin yarım ili, başqa hesabatlar
2022-ci ilin ilk yarısında xarici müəssisə və təşkilatlar Azərbaycanın iqtisadi və sosial sahələrinə 1 milyard 606,3 milyon manat sərmayə qoyub. Hesabatı yayan Dövlət Statistika Komitəsi bildirir ki, vəsaitin 94,6 faizi Böyük Britaniya, İsveçrə, ABŞ, Yaponiya, Türkiyə, Norveç, Rusiya, İran, Hindistan və Fransa sərmayədarlarına məxsusdur.
Yanvar-iyun ayları üzrə ümumi investisiya 6 milyard 299,6 milyon manat göstərilir: “Sərmayənin 60 faizi məhsul istehsalı sahələrinin, 33,8 faizi xidmət sahələrinin, 6,2 faizi yaşayış evlərinin tikintisinin payına düşüb, müəssisə və təşkilatların vəsaitləri 3 milyard 350,8 milyon manat, büdcə vəsaitləri 1 milyard 964,8 milyon manat, əhalinin şəxsi vəsaitləri 476,1 milyon manat, başqa vəsaitlər 317,5 milyon manat, bank kreditləri 190,4 milyon manat təşkil edib”.
Rəsmi məlumata əsasən, 2022-ci il iyulun 1-nə statistik vahidlərin (fərdi sahibkarlar istisna olmaqla) sayı 174795-ə çatıb, reyestrdə qeydiyyatdan keçmiş statistik vahidlərdən tam xarici investisiyalı və birgə müəssisələri əsasən Türkiyə, İran, Rusiya, Böyük Britaniya, ABŞ və Almaniya sahibkarları yaradıb.
Hüquqi şəxs yaratmadan sahibkarlıq fəaliyyəti ilə məşğul olan rəsmi fərdi sahibkarların sayının 1 milyon 193 mini keçdiyi vurğulanır.
