Reklamda medianın payı
“Turan” informasiya agentliyinin direktoru Mehman Əliyev Dövlət Statistika Komitəsinə istinadla kütləvi informasiya vasitələrinin 2021-ci ildəki reklam gəlirlərinə nəzər salıb. Jurnalist yazır ki, 2021-ci ildə bütün növ reklam məhsul və xidmətlərinin satışı üzrə gəlirlər 98,9 milyon manat olub: “Kütləvi informasiya vasitələri reklam yayımından 14,8 milyon manat əldə edib. Ümumi reklam həcmində kütləvi medianın xüsusi çəkisi 15 faiz həddində rəsmiləşib.
Media reklamının böyük hissəsi teleradio şirkətlərinin payına düşüb: 13,3 milyon manat. Televiziyanın payı 97 faizə çatıb. Müxtəlif bildirişlərdə, çap və audiovizual məhsullarda reklam gəlirləri ümumilikdə 1 milyon 323 min manat göstərilir.
Reklam informasiyası istehsalçıları il ərzində 32 milyon manat, onun yerləşdirilməsi ilə məşğul olan şirkətlər 31,7 milyon manat gəlir götürüb.
2021-ci ildə Azərbaycanda ümumi daxili məhsul (ÜDM) real qiymətlərlə 92,86 milyard manat təşkil edib. ÜDM-də media reklamının payı 0,015 faiz olub. Beynəlxalq norma ÜDM-in 1 faizidir”.
