9 şikayətçiyə təzminat qərarı
Avropa İnsan Hüquqları Məhkəməsi iyulun 21-də Azərbaycandan 9 şikayət üzrə qərarını elan edib. Hüquqşünas Xalid Ağalıyevin yaydığı məlumata görə, 2016-cı ildə müxalif partiyaların kütləvi aksiyasında tutularaq inzibati qaydada həbs edilmiş Məmməd Balaməmmədov, Nuru Nuruzadə, Elton Əliyev, Toğrul İbrahim, Orxan Carçıyev, Ruslan Qarayev, Ülfət Həsənqarayev, Vüsal Tağızadə və Sahib Rüstəmlinin şikayətlərində Avropa İnsan Hüquqları Konvensiyası ilə qorunan toplaşmaq azadlığı hüququnun pozulduğu, onlarla davranışın qeyri-qanuni və qeyri-proporsional olduğu vurğulanıb.
Kommunikasiya mərhələsində şikayətçilər Azərbaycan dövləti ilə anlaşıblar. 3 ay ərzində ərizəçilərin hər birinə 3000 avro təzminat ödənməlidir.
Novator.az bildirir ki, Fransanın Strasburq şəhərində yerləşən, hakimləri Avropa Şurasına üzv ölkələrdən seçilən Avropa Məhkəməsi Avropa İnsan Hüquqları Konvensiyasına riayət olunmasına nəzarət edir.
Azərbaycan 1949-cu ildə yaradılmış Avropa Şurasına 2001-ci ildə qoşulub, 2002-ci ildən Avropa Məhkəməsinin təsir dairəsindədir.
