SOCAR-ın borcu bir ildə 26,8 faiz artıb
Bakı Araşdırmalar İnstitutu Dövlət Neft Şirkətinin (SOCAR) audit hesabatına əsaslanan statistika yayıb.
Novator.az bildirir ki, nizamnaməsinə görə, SOCAR Azərbaycanda və xaricdə neft və qaz yataqlarının axtarışını, kəşfiyyatını, hazırlanmasını, işlənməsini, neftin, qazın, kondensatın hasilatını, nəqlini, emalını, neft, neft-kimya və qaz məhsullarının paylanmasını, satışını həyata keçirir.
Statistikaya əsasən, 2021-ci ildə SOCAR-ın aktivləri 2020-ci illə müqayisədə 8,1 faiz artaraq 69,3 milyon manata, borc öhdəlikləri 26,8 faiz artaraq 21,3 milyon manata çatıb.
Bir ildə şirkətin ümumi xərclərinin 47,9 faiz, gəlirlərinin 56,3 faiz artdığı vurğulanır.
Dövlət Neft Şirkəti 2020-ci ildə Azərbaycan İnvestisiya Holdinqinin idarəetməsinə verilib. 2021-ci ildə SOCAR-ın fəaliyyətinə ümumi rəhbərliyi və nəzarəti həyata keçirmək üçün Müşahidə Şurası yaradılıb. Müşahidə Şurasına sədrlik iqtisadiyyat naziri Mikayıl Cabbarova həvalə olunub.
2022-ci il fevralın 10-da Rövşən Nəcəf Dövlət Neft Şirkətinin birinci vitse-prezidenti təyin edilib. O, prezident vəzifəsinin müvəqqəti icraçısıdır.
Dövlət Neft Şirkətinin mərkəzi ofisi Bakıda yerləşir.
