Müsavat fəalına 30 sutkalıq cəza
20 iyul aksiyasında tutulan gənc müsavatçı inzibati həbs cəzası alıb.
Bir qrup fəal iyulun 20-si Bakıda, Nazirlər Kabinetinin binası qarşısında piket keçirməyə cəhd göstərib. Bakı Şəhər İcra Hakimiyyəti quru sərhədlərin açılması tələbi qoyulan aksiyaya razılıq vermədiyi üçün polis əməkdaşları Nazirlər Kabinetinə yaxın həndəvərdə toplaşanları ərazidən uzaqlaşdırıb, bəzi şəxsləri tutub.
Aksiyada saxlananlar həmin gün sərbəst buraxılsa da, Müsavat Partiyasının üzvü Əziz Məmiyevə Səbail Rayon Məhkəməsinin qərarı ilə 30 sutka inzibati həbs cəzası verilib. Daxili İşlər Nazirliyinin məlumatına görə, Salyan rayon sakini, Bakıda yaşayan 1993-cü il təvəllüdlü Əziz Məmiyev polis əməkdaşlarının qanuni tələbinə riayət etməyərək onlara müqavimət göstərib.
Müsavat Partiyasından Novator.az-a verilən bilgidə isə qeyd olunur ki, Əziz Məmiyev heç bir qanunsuz hərəkət etmədiyi anda ifrat güc tətbiq edilməklə saxlanıb və ona qarşı fiziki zorakılıq həyata keçirilib, fiziki təzyiqlər fəal polis maşınına mindirildikdən sonra da davam edib.
2020-ci ilin yazından Azərbaycanda yeni koronavirus infeksiyasına görə xüsusi karantin rejimi tətbiq olunur. Nazirlər Kabineti ölkəyə giriş-çıxışa məhdudiyyətə – quru sərhədlərin vətəndaşlar üçün qapalı olmasına qərar verib, sonuncu dəfə qadağanın müddətini 2022-ci il sentyabrın 1-dək uzadıb.
Müxalif siyasətçilər, müstəqil ekspertlər hesab edir ki, quru sərhədlərin bağlı qalması əhalinin dolanışığına, səfər imkanlarına mənfi təsir göstərir.
