Bir kürsünün iki iddiaçısı
Böyük Britaniya parlamentinin alt qanadı olan İcmalar Palatasının hakim Mühafizəkarlar Partiyasından deputatları yeni lider seçkisi üzrə səsverməni bitirib. İyulun 20-də keçirilmiş beşinci turda son mərhələyə çıxan iki namizəd bəlli olub: Rişi Sunak və Elizabet (Liz) Trass. Partiya lideri qurumun üzvləri arasında sentyabrın 5-dək davam edəsi seçkinin nəticəsində müəyyənləşəcək.
İyulun 7-dək Mühafizəkarlar Partiyasına baş nazir Boris Conson liderlik edib. O, partiya daxilində etimadı itirdiyinə görə istefa verib, ancaq yeni lider seçilənə qədər səlahiyyətlərini saxlayır.
Novator.az bildirir ki, Rişi Sunak 1980-ci ildə doğulub. Əslən hindistanlıdır. Oksford və Stenford universitetlərində ali təhsil alıb. 2015, 2017 və 2019-cu illərdə İcmalar Palatasının üzvü seçilib. 2020-2022-ci illərdə maliyyə naziri olub.
Liz Trass 1975-ci ildə doğulub. Oksford Universitetinin Merton kollecini bitirib. Liberal Demokrat Partiyasının üzvü olub, 1996-cı ildə Mühafizəkarlar Partiyasına qoşulub. 2014-2016-cı illərdə ətraf mühit, ərzaq və kənd təsərrüfatı naziri, 2016-2017-ci illərdə ədliyyə naziri, 2019-2021-ci illərdə xarici ticarət naziri postlarını tutub. 2021-ci il sentyabrın 15-dən xarici işlər naziridir.
1964-cü il təvəllüdlü Boris Conson 2019-cu il iyulun 23-də Mühafizəkarlar Partiyasının lideri seçilib, iyulun 24-də baş nazirliyə başlayıb. 2019-cu il dekabrın 12-də keçirilmiş parlament seçkisini udan Mühafizəkarlar Partiyası yenidən hökumət qurub. Mühafizəkarlar Partiyası 650 yerlik İcmalar Palatasında çoxluqdadır.
