Xeyir-dua, ümid
Siyasətçilər Azərbaycanın Avropa İttifaqı ilə enerji sahəsində strateji tərəfdaşlığa dair anlaşma memorandumu imzalamasını şərh edib.
İyulun 18-i Bakıda prezident İlham Əliyevlə Avropa Komissiyasının sədri Ursula fon der Lyayenin imzaladığı sənəd Cənub Qaz Dəhlizi ilə Avropaya qaz ixracının ildə 8 milyard kubmetrdən 20 milyard kubmetrə çatdırılmasını nəzərdə tutur.
Avropa İttifaqı 27 ölkəni (Almaniya, Avstriya, Belçika, Bolqarıstan, Çexiya, Danimarka, Estoniya, Finlandiya, Fransa, Xorvatiya, İrlandiya, İspaniya, İsveç, İtaliya, Kipr, Latviya, Litva, Lüksemburq, Macarıstan, Malta, Niderland, Polşa, Portuqaliya, Rumıniya, Slovakiya, Sloveniya, Yunanıstan) birləşdirir.
Novator.az-ın məlumatına görə, Müsavat Partiyasının başqanı Arif Hacılı yazır ki, enerji təhlükəsizliyi sahəsində strateji tərəfdaşlıq sənədi Azərbaycanın maraqları, həmçinin Avropa ölkələrinin Rusiyadan enerji asılılığının azalması baxımından mühüm hadisədir: “Ümid edirəm enerji təhlükəsizliyi maraqları insan haqları və demokratiya prinsiplərinin ikinci plana keçməsi ilə nəticələnməyəcək və Qərb Rusiyada bu sahədəki loyal siyasəti nəticəsində indi üzləşdiyi problemlərlə Azərbaycanda və enerji donoru olan digər ölkələrdə üzləşməyəcək”.
Respublikaçı Alternativ Partiyasının Siyasi Komitəsinin üzvü Natiq Cəfərli qeyd edir ki, Avropa İttifaqı ilə yeni enerji anlaşması tək Azərbaycanın deyil, bölgənin də qurunmasını, önəmini artıracaq, münaqişələrin önlənməsinə xidmət edəcək, Cənubi Qafqazda sülhün bərqərar olması və qorunması üçün qalxan olacaq: “Yeni anlaşma Azərbaycanın iqtisadi vəziyyətinə də müsbət təsir göstərəcək, qaz gəlirləri artacaq, ölkənin Qərbə iqtisadi bağlantısı möhkəmlənəcək: “Avropa İttifaqı ilə strateji tərəfdaşlıq sazişi imzalanması da gündəmdədir. Azərbaycanın Avropa İttifaqı ilə əlaqələrinin genişlənməsi ölkənin strateji dövlət maraqlarına tam uyğundur, Qərblə daha sıx bağlara yol açır”.
