Qiymət, gəlir, başqa hesabatlar
2022-ci ilin yanvar-iyun aylarında Azərbaycanın pərakəndə ticarət şəbəkəsində əhaliyə 22 milyard 520,3 milyon manatlıq məhsul satılıb, xidmət subyektləri 4 milyard 189,6 milyon manatlıq ödənişli xidmət göstərib. Novator.az-ın məlumatına görə, hesabatı yayan Dövlət Statistika Komitəsi bildirir ki, 2021-ci ilin ilk yarısı ilə müqayisədə əmtəə dövriyyəsi 2,9 faiz, əhaliyə göstərilmiş ödənişli xidmətlərdən əldə olunan gəlir 7,4 faiz artıb.
Rəsmi açıqlamaya əsasən, yanvar-iyun aylarında istehlak qiymətləri 2021-ci ilin eyni dövrünə nəzərən 12,9 faiz yüksəlib, ərzaq məhsulları, içkilər və tütün məmulatları 18,4 faiz, qeyri-ərzaq malları 6,7 faiz, əhaliyə göstərilən ödənişli xidmətlər 10,3 faiz bahalaşıb.
İyunun 1-nə muzdlu işçilərin orta aylıq nominal əməkhaqqının 2021-ci ilin eyni dövrünə nisbətən 14 faiz artaraq 825,3 manata çatdığı, əhalinin gəlirlərinin nominal ifadədə 19,9 faiz artdığı vurğulanır.
Hesabata görə, yanvar-iyun aylarında dövlət büdcəsinə 14 milyard 205,5 milyon manat vəsait daxil olub, büdcədən 12 milyard 936,6 milyon manat xərclənib.
İyunun 1-nə ölkənin bank və digər kredit təşkilatlarının kredit portfeli milli valyuta ekvivalentində 18 milyard 577,9 milyon manat, əhalinin banklardakı əmanətlərinin milli valyuta ekvivalentində məbləği 10 milyard 593,2 milyon manat göstərilib.
