Gömrük Komitəsinə sədr əvəzi təyin olundu
İyulun 18-də fərman imzalayan prezident İlham Əliyev Dövlət Gömrük Komitəsinin əsasnaməsini yeniləyib, sədrin birinci müavini ştatının sayını ikiyə çatdırıb. Bunun ardınca prezident Şahin Soltan oğlu Bağırovun Dövlət Gömrük Komitəsi sədrinin birinci müavini təyin edilməsinə sərəncam verib. Dövlət Gömrük Komitəsinin sədri təyin olunanadək həmin vəzifənin müvəqqəti icrası Şahin Bağırova həvalə edilib.
Şahin Bağırov 1965-ci ildə doğulub. Voronej Dövlət Universitetinin (Rusiya) iqtisadiyyat fakültəsini bitirib. 1992-ci ildən gömrük orqanlarında xidmət edib, müxtəlif məsul vəzifələrdə çalışıb, 2014-2018-ci illərdə Dövlət Gömrük Komitəsi sədrinin müavini olub.
İyulun 15-də Səfər Mehdiyev Dövlət Gömrük Komitəsinin sədri vəzifəsindən götürülüb.
Komitə sədrinin birinci müavini postunu İsmayıl Hüseynov, müavin vəzifələrini Rza Həsənəliyev, Əsgər Abdullayev, İqbal Babayev və Cavad Qasımov tutur.
