Artım və azalma statistikası
Dövlət Statistika Komitəsi makroiqtisadi göstəriciləri açıqlayıb. Novator.az bildirir ki, hesabata görə, 2022-ci ilin yanvar-iyun aylarında Azərbaycanda 63,4 milyard manatlıq, əvvəlki ilin eyni dövrü ilə müqayisədə 6,2 faiz çox ümumi daxili məhsul (ÜDM) istehsal edilib, neft-qaz sektorunda 0,2 faiz, qeyri neft-qaz sektorunda 9,6 faiz artım qeydə alınıb.
Əhalinin hər nəfərinə düşən ÜDM 6304,9 manat göstərilir.
2021-ci ilin ilk yarısına nəzərən sənayedə 2,1 faiz (neft-qaz sektorunda 0,6 faiz, qeyri neft-qaz sektorunda 11,5 faiz) yüksəliş olduğu vurğulanır.
Kənd təsərrüfatında heyvandarlıq məhsulları istehsalının 2,8 faiz artdığı, bitkiçilik məhsulları istehsalının 2,7 faiz azaldığı qeyd edilir.
Açıqlamaya əsasən, yanvar-iyun aylarında əsas kapitala 6 milyard 299,6 milyon manat, 2021-ci ilin eyni dövrü ilə müqayisədə 0,7 faiz çox vəsait yönəldilib, neft-qaz sektoruna investisiyaların həcmi 20,7 faiz azalıb, qeyri neft-qaz sektoruna yönəldilən vəsaitin həcmi 18,5 faiz artıb.
Nəqliyyat sektoruna gəlincə, 2021-ci ilin ilk yarısı ilə müqayisədə yük daşınması 11,2 faiz, sərnişin daşınması 37,4 faiz artıb.
İnformasiya və rabitə xidmətlərinin həcminin 14,2 faiz artdığı bildirilir.
