Zamin Salayev aclıq edir
AXCP-nin Salyan şöbəsinin sədri Zamin Salayev iyulun 7-dən aclıq aksiyası keçirir, iyulun 14-dən su içməyi də dayandırıb. Vəkili Nemət Kərimlinin açıqlamasına görə, cəbhəçi 30 sutkalıq inzibati həbs cəzasına etiraz edir. Cəzanı iyulun 7-də Salyan Rayon Məhkəməsi polis işçisinin qanuni tələbinə qəsdən tabe olmamaq ittihamı ilə kəsib, iyulun 13-də Şirvan Apellyasiya Məhkəməsi həmin qərarı qüvvədə saxlayıb.
Novator.az bildirir ki, rəsmi versiyaya əsasən, Zamin Salayevin oğlu, zərgər Oqtay Salayev iyunun 29-da öz avtomobili ilə yol hərəkəti qaydalarını pozub, üstündə ödənməmiş cəriməsi olan nəqliyyat vasitəsi mühafizəli meydançaya yerləşdirilib, bundan narazı qalan Zamin Salayev iyulun 7-də şəhərin mərkəzi parkında səs-küy qaldırıb, onu intizama dəvət edən polis əməkdaşlarına isə müqavimət göstərib.
AXCP-dən verilən bilgiyə əsasən, Zamin Salayev iyulun 7-si mərkəzi parkda olarkən “Facebook” hesabından canlı yayıma çıxıb, oğlunun avtomobilindən qızıl-zinət əşyalarının, sənədlərin oğurlandığını deyib, polisi araşdırma aparmamaqda ittiham edib.
Zamin Salayev 2020-ci il aprelin 20-dən 2022-ci il yanvarın 19-dək azadlıqdan məhrumetmə cəzası çəkib. O, polis zabiti Həmzə Əzizovun şikayəti əsasında ağır cinayətdə ittiham etməklə böhtan atmaqda və təhqirdə təqsirli bilinmişdi.
