Nazirlik yarım ilə yekun vurdu
Rəsmi məlumata görə, iyulun 15-i Daxili İşlər Nazirliyində kollegiya iclası keçirilib, 2022-ci ilin yanvar-iyun aylarının yekunları müzakirə olunub. Hesabatla çıxış edən nazirin birinci müavini Seyfulla Əzimov yarım ildə daxili işlər və prokurorluq orqanları üzrə 17411 cinayətin qeydə alındığını, onların 84 faizinin böyük ictimai təhlükə törətməyən və az ağır cinayət olduğunu, 90,2 faizinin açıldığını deyib, 4832 hüquqazidd əməlin qarşısının alındığını, axtarışda olan 2685 şəxsin tutulduğunu, dövlətə, hüquqi və fiziki şəxslərə dəymiş maddi ziyanın 89,2 faizinin ödətdirildiyini vurğulayıb.
Məruzəçi 473 kriminal qrupun zərərsizləşdirildiyini, qanunsuz olaraq odlu silah saxlayan və daşıyan 125 nəfərin cinayət məsuliyyətinə cəlb edildiyini, qeyri-leqal dövriyyədən 1 ton 975 kiloqram narkotik vasitə çıxarıldığını, qanunsuz kultivasiya olunan 105 ton narkotik xassəli bitkinin aşkarlanıb məhv edildiyini nəzərə çatdırıb.
