Məhbus jurnalist və bloqçular
Novator.az siyasi motivlərlə həbs olunduğu bildirilən jurnalist və bloqçuların siyahısına nəzər salıb.
Jurnalist Polad Aslanov 2019-cu il iyunun 12-də həbs edilib, dövlətə xəyanət ittihamı ilə 13 il azadlıqdan məhrumetmə cəzası alıb.
Hüquq müdafiəçisi, jurnalist Elçin Məmməd 2020-ci il martın 30-da tutulub, xeyli miqdarda ziyan vurmaqla oğurluqda və qanunsuz döyüş sursatı saxlamada təqsirli bilinib, 4 il azadlıqdan məhrumetmə cəzası alıb.
Jurnalist, ictimai fəal Abid Qafarov 2022-ci il iyulun 13-də böhtan və təhqirdə təqsirli bilinərək 1 il müddətinə azadlıqdan məhrum edilib.
Bloqçu Aslan Qurbanov 2020-ci il iyulun 14-də tutulub, dövlət əleyhinə yönələn açıq çağırışlarda təqsirli bilinərək 7 il müddətinə azadlıqdan məhrum edilib.
Bloqçu Rəşad Ramazanov 2022-ci il mayın 20-si Bakıda tutulub, satış məqsədi ilə qanunsuz olaraq külli miqdarda narkotik vasitə saxlamada təqsirli bilinir.
Rəşad Ramazanov eyni ittihamla 9 may 2013-cü ildə tutularaq 9 il müddətinə azadlıqdan məhrum edilib, 2019-cu il martın 17-də əfv sərəncamı ilə azadlığa çıxıb.
Bloqçu İlham Aslanoğlu 2022-ci il iyunun 9-da 6 ay müddətinə azadlıqdan məhrum edilib. O, təhqirdə təqsirli bilinib.
Avropa Şurasının meyarlarına əsasən, azadlıqdan məhrum edilən şəxsə bu hallarda siyasi məhbus kimi baxılmalıdır: saxlanma fikir, vicdan və din azadlığı, fikrin ifadə olunması və informasiya azadlığı, toplaşma və birləşmə azadlığı pozulmaqla həyata keçirilibsə; saxlanma istənilən cinayətlə əlaqəsi olmadan siyasi səbəblərdən həyata keçirilibsə; həbsdə saxlamanın müddəti və ya onun şərtləri şəxsin ittiham olunduğu cinayətə proporsional deyilsə; vətəndaş digər şəxslərlə müqayisədə ayrı-seçkilik əsasında saxlanıbsa və ya saxlama ədalətsiz məhkəmə çəkişməsinin nəticəsidirsə və bu, hakimiyyətin siyasi motivləri ilə bağlıdırsa.
