Jurnalistin hədələnməsi: nə yenilik var?
“Kanal 13” internet televiziyasının rəhbəri Əziz Orucov iyulun 14-də Novator.az saytına danışıb.
Əziz Orucov iyulun 7-si Bakıda hədələnib. Həmin gün axşam anası, yoldaşı və azyaşlı övladı ilə şəhərə çıxan jurnalistə Sahil bağında bir nəfər yaxınlaşıb, hədə tonunda danışıb, təhdid ifadələri işlədib.
İyulun 10-da Daxili İşlər Nazirliyinin rəsmisi Elşad Hacıyev həmin şəxsin saxlandığını açıqlayıb.
Həmin adam kimdir, hazırda haradadır, araşdırmanın ilkin nəticələri bəllidirmi? İyulun 14-də Novator.az-ın bu suallarını cavablandıran Əziz Orucov deyib ki, həmin şəxsi Bakı Şəhər Baş Polis İdarəsində görüb: “Adamla bağlı araşdırmalar aparılır, başqa məlumatım yoxdur”.
Əziz Orucov 2017-2018-ci illərdə həbsdə olub. Beynəlxalq hüquq müdafiə təşkilatları onu vicdan məhbusu və siyasi məhbus kimi tanıyıb. 2020-ci ildə jurnalistin məhkumluğu götürülüb.
