Baş nazir gedir, həm də hökumət qurmaq istəyir
Estoniyada hökumət böhranı yaşanır. İyulun 14-də baş nazir Kaya Kallas istefa verib, bu isə hökumətin tam tərkibdə istefası deməkdir.
1977-ci il təvəllüdlü Kaya Kallas İslahatçılar Partiyasının sədridir. Baş nazir postunu 2021-ci il yanvarın 25-dən tutan Kaya Kallasın hökumətində böhran Mərkəz Partiyasının hakim koalisiyanı tərk etməsi ilə başlayıb. Mərkəz Partiyası hökumətin eston dilində ibtidai təhsil layihəsinə qarşı çıxıb.
Kaya Kallas yeni hökuməti Vətən Partiyası və Sosial Demokrat Partiyası ilə birgə qurmaq niyyətindədir.
Estoniyada hökumət parlament seçkisinin nəticələri əsasında formalaşır. 2019-cu il martın 3-də seçilmiş 101 nəfərlik indiki parlamentdə İslahatçılar Partiyası, Mərkəz Partiyası, Mühafizəkar Xalq Partiyası, Vətən Partiyası, Sosial Demokrat Partiyası təmsil olunur.
Novator.az bildirir ki, Estoniyada prezident postunu 1958-ci il təvəllüdlü Alar Karis tutur. O, 2021-ci il avqustun 31-i parlamentdə dövlət başçısı seçilib.
