Terror seçkiyə əngəl olmadı
Yaponiya parlamentinin yuxarı palatasına seçki təxirə salınmayacaq. Novator.az-ın məlumatına görə, baş nazir, hakim Liberal Demokrat Partiyasının sədri Fumio Kişida iyulun 8-də belə bəyanat verib. O, azad və təmiz seçkinin nəyin bahasına olur-olsun qorunmasının vacib olduğunu vurğulayıb.
Yuxarı palataya seçki iyulun 10-na təyin edilib. 245 nəfərlik yuxarı palatanın 124 üzvü seçilməlidir.
Seçki kampaniyasının finişinə az qalmış – iyulun 8-də ölkə terror aktı ilə sarsılıb. Sabiq baş nazir, Liberal Demokrat Partiyasının üzvü Sindzo Abe Nara şəhərində silahlı hücuma məruz qalıb. Seçkiqabağı küçə toplantısında çıxış edən Sindzo Abe iki güllə yarası alıb, bir neçə saat sonra xəstəxanada keçinib.
1954-cü il təvəllüdlü Sindzo Abe 2006-2007 və 2012-2020-ci illərdə baş nazir olub.
Yaponiya konstitusiyalı monarxiyadır. 2019-cu il mayın 1-dən Akihito imperatorluq edir.
İcra hakimiyyətini hökumət həyata keçirir. Hökumət parlamentin 465 nəfərdən ibarət aşağı palatasına seçkinin nəticəsi əsasında qurulur. Hazırda Liberal Demokrat Partiyası və müttəfiqlərinin 291 mandatı var. 2021-ci il oktyabrın 4-dən baş nazir postunu Liberal Demokrat Partiyasının sədri Fumio Kişida tutur.
Yuxarı palatada hakim koalisiya 141 mandatla təmsil olunur.
