Zülmün nümayişi
Müsavat Partiyasının başqanı Arif Hacılı Azərbaycanın quru sərhədlərinin bağlı qalmasından yazıb. Novator.az-ın məlumatına görə, siyasətçi qeyd edir ki, quru sərhədlərin açılmaması xalqın iradəsini heçə saymağın, xalqa qarşı əndazəni aşan zülmün, azğınlığın nümayişidir: “Quru sərhədlərin bağlı qalması milyonlarla şəxsin həyatını qaraldır, dolanışığına mənfi təsir göstərir, çörəyini kəsir. Yalnız mafiya qruplarının daha da varlanmasına xidmət edən bu qərar miqyasına və nəticələrinə görə sosial təminat alan yoxsulların pulunu mənimsəməklə müqayisədə daha böyük cinayətdir”.
2020-ci ilin yazından Azərbaycanda yeni koronavirus infeksiyasına görə xüsusi karantin rejimi tətbiq olunur. Nazirlər Kabineti ölkəyə giriş-çıxışa məhdudiyyətə – quru sərhədlərin vətəndaşlar üçün qapalı olmasına qərar verib, sonuncu dəfə qadağanın müddətini 2022-ci il sentyabrın 1-dək uzadıb.
2019-cu ilin dekabrında Çində üzə çıxıb dünyanı bürüyən yeni koronavirus infeksiyasına Azərbaycanda ilk yoluxma 2020-ci il fevralın 28-də qeydə alınıb. Son hesabata əsasən, 793273 nəfər koronavirusa yoluxub, onların 9717-si vəfat edib, 188-i aktiv xəstədir, qalanları müalicə olunaraq sağalıb.
