Qaz bazarında çevriliş?
İqtisadçı Rövşən Ağayev Beynəlxalq Enerji Agentliyinin yeni hesabatına nəzər salıb. O yazır ki, rəsmi açıqlamaya görə, son bir ildə ABŞ-dan Avropaya qaz ixracı 15 dəfədən çox artıb, köhnə qitənin Rusiyadan qaz idxalı isə 3 dəfə azalıb: “Statistikaya əsasən, 2021-ci ilin iyununda Rusiyanın qaz ixracı 12 milyard kubmetr, ABŞ-ın qaz ixracı 0,3 milyard kubmetr olub. 2022-ci ilin iyununda Rusiyadan ixrac 4 milyard kubmetrə enib, ABŞ-dan ixrac 4,5 milyard kubmetrə yüksəlib, ilk dəfə ABŞ Avropanın qaz bazarında Rusiyanı üstələyib.
Rusiyanın Ukraynadakı işğalçı müharibəsinin mümkün qədər tez və təcavüzkarın məğlubiyyəti ilə başa çatması həm də Avropanın Rusiya enerji daşıyıcılarından mümkün qədər tez imtina etməsindən asılıdır”.
2014-cü ildə Rusiya Ukraynanın Krım yarımadasını zəbt edərək özünə birləşdirib, Donetsk və Luqansk vilayətlərinin bir hissəsini də tutaraq hər iki ərazidə separatçı rejimlər qurub.
2022-ci il fevralın 21-də Rusiya Donetsk və Luqansk vilayətlərində qurulmuş rejimləri müstəqil dövlətlər kimi tanıyıb, fevralın 24-dən isə Ukraynada total hərbi əməliyyatlar aparır.
Fevralın 22-dən başlayaraq dünya birliyi Rusiyaya sanksiyalar tətbiq edir. Avropa İttifaqına üzv 27 ölkənin sanksiyalarının bir qismi Rusiyanın neft və qazından tədricən imtinaya yönəlib.
