Səfər anonsları
Prezident İlham Əliyevin Türkmənistanın paytaxtı Aşqabada səfəri başa çatıb. AZƏRTAC xəbər verir ki, səfərin sonunda, iyunun 29-u axşam İlham Əliyev Rusiya prezidenti Vladimir Putinlə görüşüb. Vladimir Putin iki ölkənin əlaqələrinin genişləndiyini və hazırkı səviyyəsinin çox yaxşı olduğunu deyib, razılaşdırılan bütün məsələlərin icra edildiyini vurğulayıb: “Ticarət dövriyyəsi artır. Bu artım keçən il 16 faizdən çox, bu ilin üç ayında 5,5 faiz təşkil edib. Beləliklə, ticarət dövriyyəsinin inamlı artımı müşahidə olunur”.
Siyasi əlaqələrə toxunan Vladimir Putin Rusiya xarici işlər nazirinin Bakıya səfərini (Bakı görüşləri) xatırladıb, baş nazirin və Dövlət Duması sədrinin də Bakıya səfərlərinin planlaşdırıldığını qeyd edib.
Azərbaycan prezidenti iki ölkə arasında ticarət dövriyyəsinin artmasından, eyni zamanda sənaye kooperasiyası, nəqliyyat və energetika sahələrində əməkdaşlığın genişlənməsindən məmnunluğunu ifadə edib.
İlham Əliyev Aşqabada Xəzəryanı dövlətlərin (Azərbaycan, Türkmənistan, Qazaxıstan, Rusiya, İran) zirvə toplantısında (Xəzər sammiti) iştirak üçün getmişdi.
