İsrail növbədənkənar seçkiyə gedir
İyunun 30-da İsrail parlamenti özünü buraxmaq və noyabrın 1-də növbədənkənar seçki keçirilməsi barədə qərar qəbul edib. Novator.az-ın məlumatına görə, hökumət koalisiyası dağıldığı üçün Naftali Bennet baş nazir postundan ayrılır, onu Yair Lapid əvəzləyir.
2019-2021-ci illərdə İsrail davamlı hökumət böhranı yaşayıb. 2019-cu il aprelin 9-da və sentyabrın 17-də keçirilmiş seçkilərdən sonra hökumət qurmaq alınmayıb. 2020-ci il martın 2-də keçirilmiş parlament seçkisindən sonra, mayın 17-də qurulan hökumətin ömrü uzun olmayıb, dekabrın 23-də parlament buraxılıb.
2021-ci il martın 23-də yeni parlament seçilib, iyunun 13-də hökumət qurulub, baş nazir postuna Yeni Sağlar İttifaqının lideri Naftali Bennet gətirilib. Koalisiya razılaşması iki ildən sonra baş nazir vəzifəsinin Gələcək Var Partiyasının lideri Yair Lapidə verilməsini nəzərdə tutub. Ancaq 2022-ci ilin iyun ayında koalisiyada parçalanma yaranıb.
İsrail parlamenti 120 nəfərdən ibarətdir. Hökumət qurmaq üçün 61 mandat lazımdır.
