Dalana doğru
İqtisadçı Rövşən Ağayev hesab edir ki, enerji və qidanın yüksək qiymətləri qlobal iqtisadiyyatı uzun müddət çıxa bilməyəcəyi dalana aparır: “Dünya iqtisadiyyatının indiki enerji qiymətlərinə dözüm limiti çox azdır. Bazarda qiymətləri düşürəcək təklif yoxdursa, qiymətləri yüksək inflyasiyanın yaradacağı tələb böhranı aşağı çəkəcək.
Beynəlxalq Enerji Agentliyinin rəhbəri Fatih Birol qlobal enerji təchizatı ilə bağlı açıqlamalar verib. O, Avropa üçün əsas təhdid kimi Rusiyanın qaz ixracını qəfil dayandıra bilməsini göstərib. Birolun fikrincə, başqa bir təhdid iqlim dəyişikliyi hədəfindən kənarlaşmaq baxımından kömürə tələbatın kəskin artmasıdır.
Agentlik rəhbəri alternativ enerjiyə sərmayələrin də görünməmiş həddə yüksəldiyini deyib. O, 2022-də təmiz enerjiyə sərmayələrin 12% təşkil edəcəyini vurğulayıb.
Günəş və külək enerjisi ilə yanaşı enerji səmərəliliyi layihələrinə sərmayələr böyük templə artır. Təkcə ABŞ-da batareya və akkumulyatorlara qoyulan investisiyalar iki dəfə yüksəlib.
Birol elektriklə işləyən avtomobillərin sürətlə artdığını da qeyd edib. Onun məlumatına görə, 2019-cu ildə dünyada satılan hər 100 avtomobildən 2-si elektriklə işləyən avtomobil olub, bu il üçün gözlənti 100 avtomobildən 15-idir”.
Novator.az-ın məlumatına görə, Rövşən Ağayev həmçinin yazır ki, ABŞ-ın Federal Ehtiyat Sisteminin rəhbəri Cerom Pauel qlobal inflyasiyanın bütün dünya üçün ciddi və uzunmüddətli problemə çevriləcəyindən narahatlığını dilə gətirib: “O, yüksək inflyasiyanın yaratdığı problemlərin əmək bazarına sıçramaqla işsizliyi yüksəldə biləcəyindən narahatlığını gizlətməyib. Bütün hallarda uzun və dərin qlobal iqtisadi böhrana hazır olmaq lazımdır – həm psixoloji, həm də resurslardan daha səmərəli istifadəyə hazırlıq baxımından”.
