Bakı Şəhər Probasiya İdarəsi siyasətçi Tofiq Yaqublunun ata yurdu Gürcüstana səfərinə icazə verməyib. İyunun 23-də Novator.az-a danışan siyasətçi deyib ki, ölkədən çıxışına, anasının il mərasimində iştiraka razılıq verilməsi üçün müraciətinə rədd cavabı alıb: “2021-ci il iyulun 11-də anam vəfat edəndə ev dustağı idim, dəfnə, yasa getməyimə razılıq verilmədi. Suraxanı Rayon Məhkəməsinə üz tutdum, müraciətim təmin edilmədi, Bakı Apellyasiya Məhkəməsi həmin qərarı qüvvədə saxladı, Ali Məhkəmə isə şikayətimə hələ də baxmayıb.

İndi şərti məhkumluq çəkirəm, üzərimdə nəzarətə məsul Bakı Şəhər Probasiya İdarəsinə müraciət etmişdim. İyunun 3-də göndərdiyim ərizədə anamın ilində iştiraka, məzarını ziyarət eləməyə razılıq istəmişdim. Yox cavabı gəldi. Məcburam yenə məhkəmə davası açam”.

1961-ci ildə Gürcüstanda, Bolnisi rayonunun İncəoğlu kəndində doğulan Tofiq Yaqublu milli azadlıq hərəkatının (1988-1991) fəalı, Birinci Qarabağ müharibəsinin veteranıdır. Əbülfəz Elçibəyin prezidentliyi dövründə (1992-1993) Binəqədi Rayon İcra Hakimiyyəti başçısının birinci müavini vəzifəsində çalışıb.

Müsavat Partiyasının və Demokratik Qüvvələrin Milli Şurasının üzvüdür.

1998-ci ildə 2 il müddətinə şərti azadlıqdan məhrumetmə cəzasına məhkum edilib.

2013-cü il fevralın 4-dən 2016-cı il martın 17-dək həbsdə olub.

2020-ci il martın 22-də Tofiq Yaqublu yenidən tutulub, sentyabrın 3-də Bakının Nizami Rayon Məhkəməsinin hökmü ilə 4 il 3 aylıq azadlıqdan məhrumetmə cəzası alıb. Sentyabrın 18-də Bakı Apellyasiya Məhkəməsi Tofiq Yaqublu haqqında həbs qətimkan tədbirini ev dustaqlığı ilə əvəzləyib.

2021-ci il iyulun 15-də Bakı Apellyasiya Məhkəməsi siyasətçiyə kəsilən 4 il 3 aylıq azadlıqdan məhrumetmə cəzasının yerdə qalan hissəsini şərti cəza ilə əvəzləyib, 2 il 6 aylıq sınaq müddəti qoyub.

Tofiq Yaqublu bəraət istəyi ilə Ali Məhkəməyə şikayət edib.