Taleh Bağırovdan qərar və çağırış
Qobustan həbsxanasında cəza çəkən Müsəlman Birliyi Hərəkatının sədri Taleh Bağırov iyunun 23-də aclıq aksiyasını dayandırıb. “Turan”ın məlumatına görə, qohumlarına zəng vuran məhbus ona dəstək verən şəxsləri də aclığa son verməyə çağırıb.
Taleh Bağırov iyunun 3-dən aclıq aksiyası keçirirdi. O, mayın 20-də tutularaq az müddət Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsində saxlanmış Müsəlman Birliyi Hərəkatının üzvləri Mail Kərimov və Süleyman Ələkbərovun işgəncəyə məruz qaldığını, bu zaman hətta Allaha küfr edildiyini bildirir, belə əməllərə yol verən şəxslərin cəzalandırılmasını istəyirdi. Ayrı-ayrı həbs yerlərində saxlanan bəzi dustaqlar və azadlıqda olan bəzi şəxslər də aksiyaya qoşulub.
1984-cü il təvəllüdlü Taleh Bağırov 2011-2012 və 2013-2015-ci illərdə həbsdə olub.
O, 2015-ci ilin noyabrında yenidən tutulub, dövlətin konstitusiya quruluşunu zorla dəyişdirmək, şəriət qanunları ilə idarə edilən dini dövlət qurmaq məqsədilə silahlanaraq hakimiyyət nümayəndələrinə qarşı terror aktları törətməyi planlaşdırmaqda təqsirli bilinərək 20 il müddətinə azadlıqdan məhrum edilib, sonradan həbs yerində qadağan olunmuş əşyaların saxlanması, gəzdirilməsi, daşınması və istifadəsində təqsirli bilinərək daha beş ay müddətinə azadlıqdan məhrumetmə cəzası alıb.
