Neftin büdcə qiyməti artırılır
Azərbaycanın 2022-ci il büdcəsində bir barrel neftin qiyməti 50 dollardan götürülüb. Parlament müzakirəsində olan yeni büdcə layihəsində qiymət 85 dollara qaldırılır.
İyunun 23-də “AzəriLayt” markalı Azərbaycan neftinin barreli 117,78 dollara satılır. Novator.az bildirir ki, bu, indiki büdcədə nəzərdə tutulandan 67,78 dollar yuxarı qiymətdir.
“AzəriLayt” yanvara 82,49, fevrala 94,20, marta 102,30, aprelə 112,33, maya 110,70, iyuna 127,48 dollarla başlayıb.
Energetika Nazirliyi gündəlik xam neft hasilatını yanvarda 580,9 min barrel, fevralda 566,3 min barrel, martda 579,4 min barrel, apreldə 579,1 min barrel, mayda 571,3 min barrel göstərib.
İri neft ixracatçılarını birləşdirən beynəlxalq koalisiya iyun üçün gündəlik hasilat normasını 695 min barrel, iyul üçün 706 min barrel müəyyən edib.
