Bolqarıstanda hökumət böhranı
İyunun 22-də Bolqarıstan parlamenti hökumətə etimadsızlıq göstərərək onu istefaya göndərib. Qərar 123 səslə qəbul edilib. Təşəbbüsü hökumətin iqtisadi kursundan və xarici siyasətinin bəzi məqamlarından narazı qalan GERB Partiyası ilə başqa müxalif qurumlar irəli sürüb.
Novator.az bildirir ki, proporsional üsulla (partiya siyahıları üzrə) seçilən Bolqarıstan parlamenti 240 deputatdan ibarətdir. 2021-ci il aprelin 4-də və iyulun 11-də keçirilmiş parlament seçkilərindən sonra hökumət qurmaq mümkün olmayıb. 14 noyabr 2021-ci il seçkisində qanunverici orqana 7 siyasi qüvvə düşüb: Yeniliklərə Davam Partiyası, GERB Partiyası, Hüquq və Azadlıq Hərəkatı, Sosialist Partiyası, Belə Xalq Var Partiyası, Demokratik Bolqarıstan Partiyası, Dirçəliş Partiyası. 13 dekabr 2021-ci ildə parlament koalisiya hökuməti quran Yeniliklərə Davam Partiyasının lideri Kiril Petkovu baş nazir seçib.
İndi Kiril Petkov hökumət qurmağa daha bir cəhd göstərməlidir. Cəhd alınmasa, hökumət qurmaq mandatı müxalif GERB Partiyasına keçəcək. Bu partiyanın lideri Boyko Borisov 2009-2013, 2014-2017 və 2017-2021-ci illərdə baş nazir olub.
