“AzəriLayt” bu il nə qədər bahalaşıb?
Energetika Nazirliyinin 17 iyun məlumatına görə, “AzəriLayt” markalı Azərbaycan neftinin barreli 125,63 dollara satılır. Novator.az bildirir ki, bu, büdcədə nəzərdə tutulandan 75,63 dollar, ilin əvvəli ilə müqayisədə 43,14 dollar yuxarı qiymətdir.
2022-ci ilin dövlət büdcəsində bir barrel neftin qiyməti 50 dollardan götürülüb. “AzəriLayt” yanvara 82,49, fevrala 94,20, marta 102,30, aprelə 112,33, maya 110,70, iyuna 127,48 dollarla başlayıb.
Rəsmi statistikaya əsasən, yanvar-may aylarında ölkədə 13,9 milyon ton neft çıxarılıb. Gündəlik xam neft hasilatı yanvarda 580,9 min barrel, fevralda 566,3 min barrel, martda 579,4 min barrel, apreldə 579,1 min barrel, mayda 571,3 min barrel göstərilib.
İri neft ixracatçılarını birləşdirən beynəlxalq koalisiya iyun üçün gündəlik hasilat normasını 695 min barrel, iyul üçün 706 min barrel müəyyən edib.
Beş ayda Azərbaycandan 8 milyard 58,7 milyon dollarlıq xam neft və xam neft məhsulu ixrac olunub.
